Gratis visning av amatørteater

Amatørteatergruppa til Teater Vestland har jobba med utdrag frå Spoon River Anthology, og no opnar dei dørene og inviterer deg til å sjå kva dei har arbeidd med denne våren.

I Spoon River Anthology møter du dei avdøde innbyggjarane i den vesle byen Spoon River – som endeleg får høve til å fortelje sine historier. Verket er ei kjend diktsamling, skriven av Edgar Lee Masters, der kvar tekst blir framført av ein avdød, tidlegare innbyggjar i Spoon River. Vi får oppleve korleis dei ser tilbake på den mest viktige augneblinken i livet sitt.

Vi får høyre om kjærleik, frykt, smerte og sorg – og korleis desse sterke kjenslene har vore med på å forme identiteten til landsbyen Spoon River.

Dikta viser oss kor sterkt vi som bur i små lokalsamfunn påverkar kvarandre, og kor mykje vi har å lære av dei som har gått føre oss. Gjennom gripande, vakre og ærlege monologar deler dei sine liv, lyster, løgner og lengslar. Eitt og eitt menneske stig fram frå grava og svarer på spørsmålet: «Om du kunne dele éin tanke, eitt augneblink, etter døden – kva ville det vere?»

Arrangementet er gratis og ope for alle. Kom og få ein smakebit på denne vakre og tankevekkjande teksten, framført av engasjerte amatørskodespelarar.