Teaterkafè: Om å sjå og elske det som varer

Poeten Joakim Kjørsvik skriv frå ein stad litt unna den tradisjonelle poesien, med ei enkel, naiv, open og klok stemme. I boka «25-september-diktene» skildrar han kjærleiken til kona på ein leiken, inderleg og ofte humoristisk måte. Ei storslagen kjærleikserklæring veks etter kvart fram frå den naive og nyfikne forelskinga. I haiku-samlinga «År og dag» ser Kjørsvik på naturen med eit liknande blikk fullt av kjærleik, slik at lesaren får lyst til å vere snill med verda og alt som finst i ho.

I denne teaterkafèen samtalar Joakim Kjørsvik med ein av sine mange begeistra lesarar, psykologen Sissel Gran. Å få kjærleiken til å vare er eit gjennomgangstema også i hennar bøker og praksis, men enkelt er det ikkje.

Å gje meining og retning til livet med ord og forteljingar er også ei drivkraft for Lucy Barton, slik vi møter ho i Idun Losnegård si tolking på Teater Vestland denne hausten. I denne samtalen får vi varme påminningar om den same innsikta: Pennen som skal skrive historia om vårt eige liv ligg i vår eiga hand.

Arrangementet er laurdag 27. september kl. 12–13 på Foajéscena i Røyst.

Det er gratis, men BILLETT må hentast ut HER.

 

Denne teaterkafèen er eit samarbeid mellom Teater Vestland og Rom for ord.