Skal vi snakke om det?

I ei polarisert verd er samtalen verdt å verne om. Snakkar vi meir enn før, men lyttar mindre? I ein hurtig straum av pyntespråk, ungdomsspråk, anglisismar og KI-genererte vendingar, når vi i det heile tatt fram til kvarandre?

Polarisering handlar dels om manglande vilje til å ta inn andre sine erfaringar. Når samtalen blir ein kamp om definisjonsmakt, er det lett for at rommet for tvil, nyansar og læring minkar. På språkkonferansen ser vi nærare på samtalen som ein demokratisk praksis, både med utgangspunkt i språk og samtaleklima.

Å halde nynorsken levande handlar også om samtalekultur. Nynorsk bygger på retten til å uttrykke seg på eigne premissar – og dermed også plikta til å lytte til andre sine.

Vi samlar nokre av dei mest markante stemmene i den offentlege samtalen til ein inspirerande og underhaldande dag. Journalist og forteljar Finn Tokvam bind det heile saman og inviterer gjester innom sofaen for samtaler. Det blir humor og alvor – og garantert ukulele!

Språkkonferansen er arrangert av sambuarane i Nynorskhuset: NRK, Firda og Teater Vestland, saman med systersentera Nynorsk mediesenter, Nynorsk avissenter og Nynorsk scenespråksenter.

 

BOLK 1: KVA VISS MASKINENE BLIR SMARTARE ENN OSS?

Vi kastar nettet breitt ut og startar friskt med programskapar Thomas Seltzer, som med velkjent glimt i auget drar opp dei politiske, økonomiske og sosiale konsekvensane av KI. Så zoomer vi inn på korleis generativ KI som språkmodell er med på å forme forteljingane om oss sjølve, før vi tar ein u-sving i sofaen til Finn Tokvam, der forfattar Katrine Sele snakkar om det språket vi berre kan skrive fram frå vårt eige indre.

BOLK 2: BOLK 2: SLIK FORSTÅR DU KIDZA

«Viss det er lov å seie, då.» Det er ikkje alltid så godt å vite kva som er innanfor å seie. I denne bolken prøver vi å bygge bru mellom generasjonane. Unge språkbrukarar møter professor Gunnstein Akselberg til ein tankevekkande og underhaldande prat om praten. Kva er det eigentleg kidza bryr seg om? Framtida Junior-redaktør Svein Olav Langåker har lese 15.000 tekstar skrivne av unge dei siste åra, og han kjem for å dele av funna sine. Så rundar vi av med dramatikar og samfunnstenkar Maria Tryti Vennerød, som spør om vi har det språket vi treng for å gjere meining av alt som skjer kring oss.

BOLK 3: POLARISERING – FOR LITE ELLER FOR MYKJE FRIKSJON?

Korleis kan vi klare å halde den gode samtalen i gang, på tvers av både berøringsangst og steile frontar. Forfattar Helene Uri snakkar om korleis språkval kan auke og minske gapet mellom oss. Retorikk-ekspert Kjell Terje Ringdal meiner ytringsrommet i Noreg er stort, men at det skortar på viljen til å lytte og å stå i ubehag. Språkkonferanse kulminerer i ein rå og ekte sofaprat om ytringsrommet, før vi avsluttar med ukulele … og kanskje til og med allsong?

Fleire føredragshaldarar blir annonserte, følg med!

 

Elles på programmet:

Minglelunsj og -middag. Vi byr dessutan på teaterframsyninga «Eg er Lucy Barton», der Lucy går i dialog med si eiga mor, begge spelte av Idun Losnegård åleine på scena.

Eit lite glimt frå «Eg er Lucy Barton»: