Som første teater i landet tar Teater Vestland den amerikanske bestseljaren om Lucy Barton til scena. På nynorsk har stykket fått tittelen «Eg er Lucy Barton”.
Elizabeth Strout sin bestseljande roman “My name is Lucy Barton” har blitt dramatisert både i USA og fleire europeiske land, men det er første gongen stykket blir sett opp her til lands. “Eg er Lucy Barton” har norgespremiere på Teater Vestland i Nynorskhuset i Førde 19. september.
Karakteren Lucy Barton, skapt av den Pulizerpris-vinnaren Elizabeth Strout, har fascinert lesarar verda over. Ho er hovudpersonen i fire bøker som har funne vegen til mange norske bokhyller. No blir historia levande på scena med skodespelar Idun Losnegård i rolla, backa av eit sterkt kunstnarleg lag på lyd, lys og videodesign.
Stykket er dramatisert av Rona Munro og omsett til nynorsk av Terje Lyngstad. Konstituert teatersjef Kristina Kjeldsberg har regi saman med co-regissør Ingvild Lien.
— Lucy Barton er mest sannsynleg frå Vestlandet, seier Kjeldsberg – med eit aldri så lite glimt i auga.
— Med det meiner eg at forfedrene hennar truleg utvandra frå Norge til Midtvesten, der historia startar.
Lucy veks opp i djup fattigdom, forsømt både materielt og emosjonelt. Mange år seinare, som kjend forfattar i New York, blir ho innlagt på sjukehus. Plutseleg sit mora ved sengekanten, etter mange år utan kontakt. Kva skal dei seie til kvarande, og er det mogleg å finne forsoning?
I det nære handlar det om eit komplisert mor-dotter-forhold, og i det store om eit samfunn som blir stadig meir polarisert.
— Lucy Barton står mellom to verkelegheiter. Oppveksten, der det utelukkande handla om å overleve. Og vaksenlivet, der alle behov er dekte, og det er plass til kunst, kjærleik og tankens fridom. Ho har gjort ei klassereise mellom to verkelegheiter som er høgst reelle i det amerikanske samfunnet. Men også her til lands aukar forskjellane, seier Kjeldsberg.
Ho håper at publikum vil kunne spegle seg i stykket og kanskje også få med seg nokre nye tankar ut att frå teatersalen og inn i kvardagen.
Etter åtte framsyningar i Førde i september og oktober reiser “Eg er Lucy Barton” på turné til kulturhus i Vestand frå januar 2026.
